લઘુકથા

આપઘાત

પત્ની બહારથી ઘરમાં આવી ત્યારે જોયું તો તેનો પતિ પંખાની હૂક પર દોરડું બાંધી આત્મહત્યા કરવાની તૈયારી કરી રહ્યો હતો. તે જોઈ પત્ની બોલી ઊઠી, "થોભો, પ્લીઝ, થોડા દિવસ થોભી જાઓ..."

પતિને આશ્ચર્ય થયું. સવારે મોટો ઝઘડો થયો હતો ત્યારે તો કહેતી હતી કે, "મરો તો સારું," તેને પૂછ્યું, "કેમ?"

"મને જોઈ લેવા દો કે બેસણા વખતે લોકો સામે મુકવા માટે તમારો કોઈ સારો ફોટો છે કે નહિ. નહિ હોય તો ફોટોગ્રાફરને બોલાવીને પડાવી લઈએ. નહિ તો લોકો વાતો કરશે કે કેવા બબૂચકને પરણી હતી. મારી પાસે કોઈ સારી સફેદ સાડી પણ નથી. તે પણ લઇ આવવી પડશે, વાળમાં ડાઈ કરવી પડશે." પછી પંખાના હૂક તરફ જોઈને બોલી, "તમે જે હૂક  પર દોરડું બાંધ્યું છે તે પ્લાસ્ટરનો પોપડો લઈને નીચે આવશે તો?.. માટે પ્લીઝ , એકાદ બે દિવસ રોકાઈ જાઓ ને..."

પતિ રોકાઈ ગયા અને હજૂ રોકાઈ ગયેલા જ છે.